Tourenberichte Saison 2010

Alli Bachtelspalter sind im Huus……..

Schön gschminkt fahred mer eimal me ab uf Turbethal an Kinderumzug. Nachem Platzkonzert mit de Gugge Turtalia gahts los. Es isch en chline aber gmuetliche Umzug. I de Halle hämer denn grad no de Uftritt, denn gits no Würschtli zur Belohnig. Mer blibed det nochli, denn gahts wider ab uf Hiwil. Am viertel vor sibni isch Abfahrt richtig Stadel.

Bachtelspalter sind on the Road……

Mer kenned de Wäg, sind au scho det gsi. Es isch wider genau so gmuetlich und luschtig wie vor zwei Jahr. Es isch en guete Uftritt, s’Volk isch voll derbi, jede hät e Büchs i de Hand und schüttlet si zum Rhythmus mit. Es hät sich glohnt da abe zfahre.

Bachtelspalter sind on the  Road……

Witer gahts nomal zrugg uf Turbethal, da hämer en Uftritt am Maskeball,d’Halle isch voll, es isch e gueti Stimmig, und es hät vill Maskierti. Denn erlebet mer en Super Uftritt vo de Gugge us Amriswil, es fezed, und au de Tambour Major git alles.

Jetzt aber ab uf Bäretswil zum nächschte und letschte Uftritt, au da lauft öppis. Euse Uftritt isch ok. Es isch en lange aber gmüetliche Tag gsi.

Alli Bachtelspalter göhnd is ………….Bett.     Uschi

D`Fahrt vo Hinwil uf Neukirch (Deutschland) isch a dä Reihe. Bevor mir aber händ chöne iistige, sind all nu is Kosmetikstudio ufgforderet worde, um sich mit Farb `s`bepinsle lo. Dä Zuäfall häts welä, dass mir grad nu für äs Fotoshooting iiglade worde sind. Im Fotostudio acho, händ sich d`Models zimli Müäh gä und det sich i diversi Posene gsetzt.
Nach ca 2 Stunde Fahrt simer mit äm Partybus im Nachbarsland acho. Gli drüberabe hämer`s Schlafgemach dörfe in Empfang nä. Zur grosse Enttüschig nöd für üs allei, do Gugge Schlosshüüler vo Bürgle TG, au dä witi Wäg in Aspruch gno hät.

Zur Stärkig hämer üs än köstliche Znacht gönt. Um diä Portione z`verdaue, hämer üs under Lüüt gmischt und glichzitig grad nu d`Stimmig abchegget. ä chlini Zwüscheprob, damit Unklarheite nu chönd besitigt werde und scho hämer üse Uftritt voreme riesige Publikum. Dä Obig hät dän jedä individuell gstaltet. Me wird aber nöd verzellt!!!
Am 8i isch tagwach gsi; bi stahlemde Sunneschii! Aschlüssend isch schminke uf äm Terminplan gstande. Mit Farb im Gsicht, händ sich d`Bachtelspalter äs "usgiebigs" Früähstück gönt. Dä nöchschti Bühneuftritt hät dän lang uf sich wart lo.
Bi starkem Schneegestöber händ mir geduldig am Strosserand gwartet, bis mir ändlich am Umzug händ chöne mitmache. D`Startnummere 54 vo ca 90 isch üs zueteilt worde.
Nachem Umzug isch alles in Bus verlade worde, damit mir üsi Heimreis händ chöne starte. Will d`Strosse nöd überall guät befahrbar sind unds Stau gha hät, hät sich üsi Heimfahrt ächli verzögeret.

LG Irene