Berichte Probeweekend

2.&3.11.2012

Samstag

Hischwil mir chömed!!! Am 2. November isch äs wiä jedes Jahr is Probeweekend gange. Belade mit Instrument, Spucktüechli, Schlafseck und em einte oder andere Schnäpsli isch d Fahrt uf Hischwil los gange. Det ahcho isch dä Frässtisch scho parat gstande und dä Zmittag isch au scho fast färtig gsi. Nachdem mir eus gstärcht händ, isch äs as traditionelle Fahne hisse gange. Eusi neue Bachtelspalter händ diä Ufgab übernoh, während diä andere dä Guggemarsch gspielt händ.

Und dän isch äs los gange mit Probe, Probe und nomal Probe. Mer händ vollgas gäh.

Scho bald isch euses Chuchiteam cho und diä feine Düft sind scho fast ä Qual gsi zum witerspielä. Bevor mer aber händ chöne ässe, hämer eus nochli müese bewegä. S Freiziititeam hät zwei lustigi Spieli für eus vorbereitet. (au diä wo kei Alkohol trinked, wüssed jetzt wiäs isch bsoffe zsii) Nachdem mer eus gfühlti 100mal dräit händ, simer mitemene PingPongBölle ufemene Löffel en Parcour gloffe/torklet/grännt. Nachane isch mit Wasser und Mehl im Muul pfiffe worde, wänn mer das so hät chöne nänne. Mit vill Glück hät mer sogar chöne erchäne was für äs Lied hinder däne Mehlwulche wo zum Muul us cho sind gsteckt händ. ;-)

Nach so vill Iisatz sind alli Bachtelspalter mitemene mega feine Vorässe, Härdöpfelstock und Blauchruut verköstiget worde. Danke vill mal as Chuchiteam Ursi und Marianne. Äs isch dä Hammer gsi!!!

Vollgfrässe häts für alli Spalter en gmüetliche Abig gäh, di einte händ Spieli gmacht, anderi händ Chrüzworträtsel glöst oder sind dusse ghöcklet mitemene feine Tee oder Lutz und händ mitenand gred und glachet.

Scho isch dä ersti Tag dure gsi und alli sind go pfuuse...

Sonntag

Nachere erholsame (zumindest sicher für di einte) Nacht simmer am Morge am achti (wie unmenschlich am So Morge) mitem Duft vo Speck und Eier ide Nase gweckt worde und hend nach dem denn all ihre lebeswichtig Kafi übercho hend es Fürstlichs Zmorge döfe gnüsse.

Churz nachdem mer eus di erste warme Sunnestrahle hend döfe is Gsicht schiine laa isches au scho losgange und mir hend eusi vom Vortag scho strapazierte Lippe, Händ und Ärm nomal zum Iisatz braacht…..und nomal….. und nomal…und nomal…zur Abwechslig hemmer denn auno Registerprobe gmacht, demit mer au sicher eusi härt erkämpfte Botoxlippe und d Schwarzenegger-ärm nöd so gschnell wider verlüred .

Nach dere Aasträngig isches denn natürli au mal wider Zit worde dasmer zu Chräfte chömed und au da hät sich s Chuchiteam nöd lumpe laa und eus uuuuuu feini Älplermaccarone zauberet mmmmmmh.

Nachem Esse häts für die Einte es Verdauigszigerettli und für di Andere es Nickerchen die Sunne geh. Nur eis hät die wunderbari Rueh gstört…..en luute Pfiff…..und scho gaats wider ab in Stolle go Chrampfe ;-). Sprich wiiterprobe und s Erlernte us de Registerprob aawende isch agseit gsii.

Uf das abe häts e churzes Päuseli geh und denn isches wiiter gange. Die Einte hend no vorbereitige für s Jubi troffe, Anderi hend Bricht für id Lokalnachrichte gschribe 2 hend en Tanz für de super neui Rhythmus erfunde und de Rest het schomal aagfange zemepacke und butze….aber au das gaat mal verbii und unter vill Gelächter hemmer denn nach getaner Arbeit euses Tänzli no probet.

Ja und denn … chunnt was all Jahr wider chunnt…….de Fahne mues wider abe. Eusi Früschling hend de Fahne heil wider abebraacht während dem mir no eis gspillt hend. Ganz spontan isch denn auno d Geburtstagsgsellschaft vo nebedraa no usechoo und het sich es Geburtstagsständli gwünscht….da hät de musikalisch Leiter nöd chöne nei säge. Also hemmer am Geburtstagschind de Wunsch natürli erfüllt und eus debii am Hüftschwung vo de einte Zueschauer döfe erfreue ;-).

Plötzli isch alles ganz gschnell gange. All hend mitghulfe das s Pfadihuus wider imene guete Zuestand abgeh werde chan und schwuppdiwupp isch de ganzi Spuk im beschauliche Hischwil wider verbii gsi. Bis zum nöööchste mal…………..

Chum doch au!

Wotsch au en Bachtelspalter wärde und mit eus di 5. Jahresziit mitgestalte und fiire?

Dänn nimm mit eus Kontakt uf oder chum a euse Neugugger-Träff

Mir freuäd eus uf dich!!!