Föteli 2017

Chlausabig

11.11.2017 - Zürich, Hombrechtikon, Hinwil & Wetzikon

Probeweekend 28. & 29. Oktober 2017

Jubiläumsausflug zum 35. Jubiläum am 4. Juni 2017

04.02.2017 - 40-jähriges Jubiläum Guggemusig Robehuuse

Neu kostümiert häts eus as Jubi vo dä Guggemusig Robehuuse zoge. Mer händ a däm Abig euses Kostüm no ohni Instrument teschted. Äs hät dä Tescht bestande, mer chan dämit bis i di frühene Morgestunde party mache. ;-)

11.02.2017 - Maskenball Bäretswil

Dä erschti Uftritt vo däre Saison hämer am Maskeball in Bäretswil gha. Am 9ni häts leider nonig sooo viel Lüüt gha, aber trotzdem hämer än super Uftritt gha. Wänns mues sii, chömer au ällei Party mache. ;-)

18.02.2017 - Maskenball Bubikon

Mer sind am Maskeball in Buebike gsi und händ än hammermässige Uftritt gha. S'Publikum hät freud gha und ohni Zuegab hämer nöd dörfe use.

19.02.2017 - Umzug Romanshorn

Am 10ni häts gheisse: "Äs git frischi Farb is Gsicht" 

Nachem schminke hämer eus mitme Büsli uf dä Wäg richtig Romanshorn gmacht. Chappe und Händsche händ bi dä meischte dörfe dihei bliibe, däfür hät d'Sunnebrülle zum Gepäck ghört. In Romanshorn isch aber d'Entüschig gross gsi. Kei Sunne und chalt isch au no gsi. Hämer ächt di falsche Sache dihei lah?

Nei, nei, wo mer bi eusere Startnummere ahcho sind, isch d'Sunne cho und eusi Sunnebrüllene sind doch noch in Iisatz cho. Trotz vielem stah und warte hämer en lässige Umzug bi hammer Wätter chöne gnüsse. Au dä Uftritt nachem Umzug hämer guet und kabut überstande und händ eus mit Brötli und Fleischchäs chöne stärche. Leider isch äs nöd allne Teilnehmer so ergange.

Nachem Ässe simer dänn zu eusem Bus und dä hät eus zrug uf Hinwil bracht. Äs isch äs cools Wucheänd gsi und mer freued eus jetzt uf s'Hinwiler Fasnacht.

 

Fasnacht Hinwil - 24.-28.02.2017

Freitag: Fasnachtseröffnung Hinwil & Auftritt im Restaurant Lenzen Steg

Am 7i isch äs losgange mit schminke. Wo mer dänn alli Farb im Gsicht gha händ hät eusi Heimfasnacht chöne losgah. Am 9i isch euse ersti Uftritt im Hirschesaal gsi. Chum isch er fertig gsi, hämer eusi Instrument id Autos glade und sind uf Steg is Restaurant Lenze go spiele.

 

Samstag: Strassenfasnacht & Maskenball Hinwil

Dank wunderbarem Wätter isch dä chlini Umzug und d Strassefasnacht in Hinwil eifach en Traum gsi. Mitemene churze Abstächer is Altersheim, hämer au det no spontan äs paarne ä Freud gmacht. Nachem Monsterkonzert simer uf Buebike ist Bahnhöfli go fein ässe. Mit vollne Büüch hämer dänn am habli 9ni dä Maskeball Hinwil eröffnet. Dä reschst vom Abig hämer im Hirschesaal gfäschted.

 

Sonntag: Kindermaskenball Hinwil

Wie scho di letschte paar Jahr hämer wieder dä Chindermaskeball mit Musig, Spieli, Tanze, Ballön und gaaaaanz viel Konfetti organisiert. Äs isch en lässige Tag gsi und trotz dä Ferie sind viel chlini Böögli bi eus gsi.

 

Dienstag: Uusböögete Hinwil

Am 6i hämer eus zum schminke troffe. Sehr sehr pünktlich simer am 8i id dä Platte / Züriwerk Buebike go spiele. Nachane simer zrug uf Hinwil und händ bim Fäschte uf euse Uftritt am 12i gwartet. Dä Uftritt hämer mitemene Überraschigs-Geburtstagsständli für eusi Jenni abgschlosse. Vo jetzt ah, verteilemer glaub regelmässig Wundercherze im Publikum, das gseht no cool us. ;-)

Sternmarsch & Beizentour Wald - 04.03.2017

Am Samstignamittag hämer am 3 gschminkt. Dänn isch äs ab uf Wald gange, wo mer vorem Sternmarsch mit Fleischchäs und Herdöpfelsalat verpflägt worde sind. Foif witeri Guggene sind mit eus sternförmig ufem Schwertplatz zäme cho, zum dä Walder Maskeball so richtig zstarte. Nacheme Monsterkonzert hät jedi Gugge ufem Platz no äs paar Lieder gspielt und dänn isch äs wiitergange mit dä Beizetour. Im Restaurant Ochse und Scheidegg hämer zwei Uftritt gah.

Umzug Robehuuse - 05.03.2017

Nachere churze Nacht häts am Sunntig zum glück wieder Schminki is Gsicht gäh und dänn isch äs uf Robehuuse gange, wo mer bi traumhaftem Wätter uf dä Umzugsstart gwarted händ. Für euse chlini Huufe isch dä Umzug recht streng gsi, aber das super Wätter und dä viele Zueschauer wo freud gha händ, händ dä Sunntig zumene richtig coole Tag gmacht.

Maskenball Stäfa & Gossau ZH - 11.03.2017

Und scho isch dä letschti Abig vo eusere Saison vor dä Türe gstande... Nachem schminke hämer euses Abschlussässe im Restaurant Salzwaage in Stäfa gha. Sehr fein isch äs gsi und mer sind mit vollne Büüch witer an Maskebal z Stäfa. Det hämer am 9ni euse Uftritt gha. Nachane isch äs witer gange uf Gossau ZH wo mer am halbi 1 euse letschti Uftritt vo dä Saison gha händ. Mer händ nomal alles gäh und äs hät so richtig grockt.